Mantra 2.6.1

अस॑न्ने॒व स॑ भवति । अस॒द्ब्रह्मेति॒ वेद॒ चेत् ।

अस्ति ब्रह्मेति॑ चेद्वे॒द । सन्तमेनं ततो वि॑दुरि॒ति ।

तस्यैष एव शारी॑र आ॒त्मा । यः॑ पूर्व॒स्य ।

अथातो॑ऽनुप्र॒श्नाः । उ॒तावि॒द्वान॒मुं लो॒कं प्रेत्य॑ ।

कश्च॒न ग॑च्छ॒ती३

आहो॑ वि॒द्वान॒मुं लो॒कं प्रेत्य॑ । कश्चि॒त्सम॑श्नु॒ता३ उ॒ ।

सो॑ऽकामयत । ब॒हुस्यां॒ प्रजा॑ये॒येति॑ । स तपो॑ऽतप्यत ।

स तप॑स्त॒प्त्वा । इ॒दꣳसर्व॑मसृजत । यदि॒दं किञ्च॑ ।

तत्सृ॒ष्ट्वा । तदे॒वानु॒प्रावि॑शत् । तद॑नु प्र॒विश्य॑ ।

सच्च॒ त्यच्चा॑भवत् ।

नि॒रुक्तं॒ चानि॑रुक्तं च । नि॒लय॑नं॒ चानि॑लयनं च ।

वि॒ज्ञानं॒ चावि॑ज्ञानं च । सत्यं चानृतं च स॑त्यम॒भवत् ।

यदि॑दं कि॒ञ्च । तत्सत्यमि॑त्याच॒क्षते ।

तदप्येष श्लो॑को भ॒वति ॥ १॥

asa̭nne̱va sa̭ bhavati | asa̱dbrahmeti̱ veda̱ cet |

asti brahmeti̭ cedve̱da | santamenaṃ tato vi̭duri̱ti |

tasyaiṣa eva śārī̭ra ā̱tmā | ya̭ḥ pūrva̱sya |

athāto̭'nupra̱śnāḥ | u̱tāvi̱dvāna̱muṃ lo̱kaṃ pretya̭ |

kaśca̱na ga̭ccha̱tī3

āho̭ vi̱dvāna̱muṃ lo̱kaṃ pretya̭ | kaści̱tsama̭śnu̱tā3 u̱ |

so̭'kāmayata | ba̱husyā̱ṃ prajā̭ye̱yeti̭ | sa tapo̭'tapyata |

sa tapa̭sta̱ptvā | i̱dam̐sarva̭masṛjata | yadi̱daṃ kiñca̭ |

tatsṛ̱ṣṭvā | tade̱vānu̱prāvi̭śat | tada̭nu pra̱viśya̭ |

sacca̱ tyaccā̭bhavat |

ni̱rukta̱ṃ cāni̭ruktaṃ ca | ni̱laya̭na̱ṃ cāni̭layanaṃ ca |

vi̱jñāna̱ṃ cāvi̭jñānaṃ ca | satyaṃ cānṛtaṃ ca sa̭tyama̱bhavat |

yadi̭daṃ ki̱ñca | tatsatyami̭tyāca̱kṣate |

tadapyeṣa ślo̭ko bha̱vati || 1||