Khaṇḍa 3
ContentsText
तृतीय खण्डः
(व्यक्तस्वरूपम्)
अथ भगवांस्तमब्रवीत्प्रजापते प्रीतोऽहं किं तवेप्सितं
तदाशंसेति । स होवाच भगवन्नव्यक्तादुत्पन्नोऽस्मि
व्यक्तं मम कृत्यमिति पुराश्रावि । तत्राव्यक्तं भवानित्यज्ञायि
व्यक्तं मे कथयेति । व्यक्तं वै विश्वं चराचरात्मकम् ।
यद्व्यज्यते तद्व्यक्तस्य व्यक्तत्वमिति ।
(जगत्सृष्ट्युपायो ध्यानयज्ञः)
स होवाच न शक्नोमि जगत्स्रष्टुमुपायं मे कथयेति ।
तमुवाच पुरुषः प्रजापते शृणु
सृष्टेरुपायं परमं यं विदित्वा सर्वं ज्ञास्यसि ।
सर्वत्र शक्ष्यसि सर्वं करिष्यसि । मय्यग्नौ स्वात्मानं
हविर्ध्यायेत्तयैवानुष्टुभर्चा । ध्यानयज्ञोऽयमेव ।
(ध्यानयज्ञमहिमा)
एतद्वै महोपनिषद्देवानां गुह्यम् । न ह वा एतस्य साम्ना
नर्चा न यजुषार्थो नु विद्यते । य इमा वेद स सर्वान्कामानवाप्य
सर्वांल्लोकाञ्जित्वा मामेवाभ्युपैति न स पुनरावर्तते य एवं वेदेति ॥ ३॥
Transliteration
tṛtīya khaṇḍaḥ
(vyaktasvarūpam)
atha bhagavāṃstamabravītprajāpate prīto'haṃ kiṃ tavepsitaṃ tadāśaṃseti | sa hovāca bhagavannavyaktādutpanno'smi vyaktaṃ mama kṛtyamiti purāśrāvi | tatrāvyaktaṃ bhavānityajñāyi vyaktaṃ me kathayeti | vyaktaṃ vai viśvaṃ carācarātmakam | yadvyajyate tadvyaktasya vyaktatvamiti |
(jagatsṛṣṭyupāyo dhyānayajñaḥ)
sa hovāca na śaknomi jagatsraṣṭumupāyaṃ me kathayeti | tamuvāca puruṣaḥ prajāpate śṛṇu sṛṣṭerupāyaṃ paramaṃ yaṃ viditvā sarvaṃ jñāsyasi | sarvatra śakṣyasi sarvaṃ kariṣyasi | mayyagnau svātmānaṃ havirdhyāyettayaivānuṣṭubharcā | dhyānayajño'yameva |
(dhyānayajñamahimā)
etadvai mahopaniṣaddevānāṃ guhyam | na ha vā etasya sāmnā narcā na yajuṣārtho nu vidyate | ya imā veda sa sarvānkāmānavāpya sarvāṃllokāñjitvā māmevābhyupaiti na sa punarāvartate ya evaṃ vedeti || 3||