Gopinam Kuca Kunkumena Nicitam

gopīnāṁ kuca-kuṅkumena nicitaṁ vāsaḥ kim asyāruṇaṁ
nindat-kāñcana-kānti-rāsa-rasikāśleṣeṇa gauraṁ vapuḥ
tāsāṁ gāḍha-karābhibandhana-vaśāl lomodgamo dṛśyate
āścaryaṁ sakhi paśya lampaṭa-guroḥ sannyāsa-veṣaṁ kṣitau

yaḥ pūrvaṁ vraja-sundarī-rati-rasair utthāpitaḥ pratyahaṁ
kālindī-puline nanarta rabhasāt śrī-rāsa-goṣṭhyāṁ
vibhuḥ so'yaṁ samprati sarva-loka-nihita-premānurāgaḥ
kalau premṇā nṛtyati nartayaty api jagad-bhūdeva-cūḍāmaṇiḥ

vedāntāgama-veda-śāstra-paṭalī-durgamya-pādāmbujaḥ
śrī-śrī-nanda-kiśora-lāsya-laharī-vidyotakānugrahaḥ
tat-kāla-smṛti-mātra-tat-kṣaṇa-valat-prema-pravāhāmbudhir
bhūdevāṅgaṇā-maṅgalo vijayate śrī-śrī-śacīnandanaḥ

mohonmāda-rasena gopa-vanitā-siktena vṛndāvanaṁ yaḥ
pūrvaṁ jagad-eka-maṅgalam alaṁ cakre ghana-śyāmalaḥ
so'yaṁ gaura-hariḥ samasta-jagatīṁ premṇā samullāsayan
kāruṇyaika-niketanaṁ vijayate gauḍāvanī-maṇḍale

nṛtyāveśa-mahollasat-sumadhura-pratyaṅga-veśojjvalaṁ
śrīkhaṇḍāguru-kuṅkumādi-sahitaṁ śrīmad-bṛhad-vakṣasā
karpūrodbhaṭa-pūga-puñja-vilasat-prārakta-bimbādharaṁ
śrī-caitanya-mahāprabhor vijayate lāvaṇya-sāraṁ vapuḥ

pratapta-kanaka-prabhaṁ vimala-pūrṇa-candrānanaṁ
galan-nayana-vāribhiḥ sapadi sikta-bhūmī-talam
sa-gadgada-giraṁ mudā sakala-deva-cūḍāmaṇiṁ
śacī-sutam ahaṁ bhaje karuṇa-sāgaram īśvaram

kadamba-kusumollasat-pulaka-puñja-puñjojjvalaṁ
jhalat-jhalad iti skhalan-nayana-vāribhir nirjharam
vayaṁ dama-damāyite hṛdi dara-sphuran-mādhurī
madhūnmada-mahā-naṭaṁ kim api dhāma vandāmahe

uccair lola-bhuja-dvayena paritaḥ svar-lokam āhlādayan
premṇā pūrita-kaṇṭha-gadgada-hari-dhvānair bhuvaṁ mohayan
cañcat-pāda-vihāri-nūpura-ravair nāgān mudā mīlayan
nityānanda-mahāprabhur vijayate śrī-malla-veśojjvalaḥ

kṛṣṇo devaḥ kali-yuga-bhavaṁ lokam ālokya sarvaṁ
pāpāsaktaṁ samajani kṛpā-sindhu-caitanya-mūrtiḥ tasmin
yeṣāṁ na bhavati sadā kṛṣṇa-buddhir narāṇāṁ dhik
tān dhik tān dhig iti dhig iti vyāharet kiṁ mṛdaṅgaḥ